កោះកុង៖ អាកាសយានដ្ឋានអន្តរជាតិតារាសាគរ ត្រៀមនឹងបញ្ចប់ការសាងសង់នៅក្នុងខែតុលា ខាងមុខ ខណៈត្រៀមបើកដំណើរការសាកល្បងនៅថ្ងៃទី៣០ ខែធ្នូ ឆ្នាំ២០២១។

រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល លោក ម៉ៅ ហាវណ្ណាល់ មានប្រសាសន៍ថា ភាគីក្រុមហ៊ុន និងរដ្ឋាភិបាល បានពិភាក្សាគ្នារួចហើយអំពីការរៀបចំ បញ្ចប់ការសាងសង់ និងត្រៀមបើកសាកល្បងស្របតាមលក្ខណៈបច្ចេកទេស ឆ្ពោះទៅរកការបើកដំណើរការជាផ្លូវការនៃព្រលានយន្តហោះ។

អាកាសយានដ្ឋានអន្តរជាតិតារាសាគរ មានទីតាំងនៅក្នុងស្រុកបទុមសាគរ ខេត្តកោះកុង ដែលត្រូវបានសាងសង់ដោយក្រុមហ៊ុនចិន Tianjion Union Development Group លើផ្ទៃដី ៤,៥ហិតា និងចំណាយទឹកប្រាក់សាងសង់ប្រមាណ ៣,៥ពាន់លានដុល្លារអាមេរិក។ អាកាសយានដ្ឋាននេះមានសមត្ថភាពទទួលយន្តហោះធំៗឱ្យចុះចតបានដូចជា Boeing 777 និង Airbus A340 ជាដើម៕